Nekad su balkoni jedina mjesta u gradovima gdje možemo uživati u svježem vazduhu i suncu. To posebno dolazi do izražaja u jesen, kada su dani kraći, a mi imamo sve manje vremena za odlazak u prirodu.
Iako je zima na pragu, to ne znači da treba da se odreknemo ugodnih trenutaka na jesenjem suncu.
Zato, ako imate balkon ili terasu, nemojte je pretvarati u skladište, nego u kutak gdje ćete provoditi trenutke odmora i uživanja na svježem vazduhu.
Savjeti za uređenje balkona
Ne morate da potrošite bogatstvo kako biste napravili svoj balkon ugodnim mjestom za odmor i relaksaciju na otvorenom. Cilj neka vam bude stvoriti toplu i ušuškanu atmosferu koja odgovara godišnjem dobu, odnosno jeseni.
Najbitnija stavka u uređenju balkona je garnitura za sjedenje. Umjesto skupih stolova i stolica, izaberite jednostavne drvene ili metalne stolice i sto na rasklapanje. Tako ih jednostavno možete skloniti za vrijeme padavina, ali i iznijeti ponovo kada uhvatite sunčane trenutke.
Nezaobilazan element koji će vam biti potreban za provođenje vremena na otvorenom su prekrivači. Kada su u pitanju deke koje ćete koristiti na otvorenom, ponude ne manjka.
Osim pletenih i frotirnih, tu su i flis deke, koje su primamljive zbog cijene, ali i raznih boja i dezena. Pored deke, možete kupiti i nekoliko jastuka, na kojima možete da sjedite kada je svježe.
Prostor na balkonu ćete učiniti omiljenim mjestom za boravak ako ga dekorišete jesenjim dekoracijama kao što su: bundeve, voće u staklenim ili pletenim posudama, rezanim i svježim jesenjim cvijećem, dekorativnim kukuruzom, orasima….
Ušuškana atmosfera
Kako dani postaju sve kraći, biće vam potrebno i odgovarajuće osvjetljenje. Možete upotrijebiti staklene lanterne, koje ćete sami napraviti, ili kupiti fenjere u koje ćete staviti svijeće za intimniju atmosferu.
Svrsi će poslužiti i staklena čaša sa svijećom. Ako imate prostrani trijem ili balkon, imajte na umu da možete kupiti infracrvene grijalice koje vam mogu poslužiti za vrijeme svježih jesenjih večeri.
U sređivanju balkona koristite dekorativne elemente koje je dovoljno vidjeti pa da vas podsjete na jesen. Jesenje cvijeće je prekrasan alat za to. Hrizanteme su nezaobilazne u uređenju jesenjeg balkona. Svojim bogatstvom cvjetova i boja vrlo lako će ispuniti prazan prostor.
Hrizanteme stavite u metalne kante različite veličine, grupišite ih da biste postigli najbolje rezultate. Pored hrizantema, možete upotrijebiti i hidrangeae. Iako već polako prolaze, još ih možete upotrijebiti kao rezano cvijeće.
Prilikom uređenja balkona nećete pogriješiti ako upotrijebite bilo koju od jesenjih boja, kao što su žuta, narandžasta, zelena i boja cigle, ali lijepo izgledaju i elegantne kombinacije poput crno-bijele.
Koristite dekoracije koje podsjećaju na jesen i stvorite mjesto u kome ćete uživati do prvog snijega. I na kraju, nemojte zaboraviti na servis za neki topli, mirisni napitak.
